Nutaarsiassat

Isumaginninnermut Aqutsisoqarfik Ivaaqqami najugaqartup innarlerneqarsimanera pillugu suliaq aallartinneqarmalli suliamik isumaginninniarluni Qaqortumiititaqarpoq. Ivaaqqami sulisut, aqutsisut najugaqartunullu ilaqutaasut Isumaginninnermut Aqutsisoqarfimmi tarnip pissusiinik ilisimasalimmit ikiorserneqarput, taamatut oqarpoq Aqutsisoqarfimmi pisortaq Helene Berthelsen.

Annertuumik innarluutilimmut, septembarip aallartilaarnerani meerartaartumut anaanaasoq oqarpoq, panini Ivaaqqamut uteqqissanngitsoq. Naalakkersuisorli Mimi Karlsen (IA) oqarpoq annertuumik innarluutillit allamut nuutsiinnarneqarsinnaasanngitsut.

Arnaq annertuumik innarluuteqartoq najukkaminut angerlarteqqinneqarnera pissusissamisoorpoq pitsaanerpaallunilu, allanimmi periarfissaqanngilaq. Najugaqartut toqqissisimanerunissaanut aaqqiissutissat misissorneqassasut, Naalakkersuisoq erseqqissaavoq.

Politiit Qaqortumi Ivaaqqami suliaq pillugu misissuileruttorput, suliarlu pillugu oqaaseqarsinnaanngillat.

Suffi Markussenip qitornaa Ivaaqqami najugaqartuuvoq, ulloq unnuarlu angerlarsimaffiusumi atornerluisoqarsimanera pillugu tupaqqavoq. Sulisut suli tatigai, qitornaatami pisariaqartitai aallaavigalugit sullinneqarpoq.

Inuit innarluuteqartut pillugit sullissinermi pitsanngorsangassat amerlapput. Folketingimi ilaasortaq Aaja Chemnitz taama isumaqarpoq. Ivaaraq pillugu oqaaseqaatini facebookimini taanna allaatigisaqarpoq.

Arnaq 23-inik ukiulik, annertuumik innarluutilik, meerartaartoq Qaqortup napparsimavianit ippassaq Ivaaqqamut angerlartinneqarpoq. Anaanasoq isumaqarpoq, mittataaffimminut uterteqqinneqartoq.

Inuit innarluuteqartut ulloq unnuarlu angerlarsimaffianni Ivaaqqami kinguaassiuutitigut atornerluisoqarsimaneranik suliaq ingerlanneqartup malitsigisaanik angajoqqaaq alla oqaluttuarpoq panini ulloq unnuarlu angerlarsimaffimmi najugaqarsimasoq pillugu arlalinnik suliassanngortitsinikuusimalluni. Persuttaasimanermut pasitsaassinermi oqartussat iliuuseqanngippallaarsimasut, taanna isumaqarpoq.

Annertuumik innarluutilimmut septembarip aappaani erneriataartumut anaanaasoq piumasaqarpoq panini Ivaaqqamut uteqqissanngitsoq, pisortanilli ilisimatinneqarsimavoq Danmarkimut nuutsinneqanngikkuni allamik periarfissaqanngitsoq.

Upernavimmi utoqqaat angerlarsimaffianni ikuallattoqassagaluarpat kaassuartakkaniinnaq ingerlasut qimarngunneqapallassinnaapput. Upalungaarsimasut pisortaat taama oqarpoq.